Monday, February 23, 2009

Maj zoralo vaś jekh meripe

Śun,
Ma bistar,
Sa so isi tal-o ćeri
Niso na mèrla!

Ni an-o Jasènovco
Na an-o Birkenau
Ni an-o Mauthauzen
Ni....
Nikote!

Tu, so mudarèja
Tiri viktìma isi maj zorali tuθar
Vaś jekh meripe
Jekh gili
Vaś jekh seripe

O asvaja na thàvd'na e daraθar
Numaj e phage ilosθar
Odolesqe so o meripe ovèla biz-o aćarutno rituàlo

I història jekh dive ka putrel o lila
Akava isi o savaxtuno meripe

Śun,
Thaj ma bistar,
Tiri viktìma isi maj zorali tuθar
Vaś jekh meripe
Vi odova - vuźo meripe

Numaj, tere vasta
Ka aćhon savaxt ratvale
Thaj ka oven pakǎrde
Ano tere mulesqo bivuźipe

Taro Kujtim Pacaku